سەرۆكوەزیران: چاوەڕێی پشتیوانی زیاتری نێودەوڵەتین بۆ ڕووبەڕووبوونەوەی ئاستەنگەكانی كەشوهەوا

ئەمڕۆ چوارشەممە، محەممەد شیاع سودانی، سەرۆكوەزیران، خواستی عێراقی دووپاتكردەوە بۆ پاڵپشتی زیاتری نێودەوڵەتی بۆ ڕووبەڕووبوونەوەی ئاستەنگەكانی كەشوهەوا و چارەسەركردنی دۆسێی ئاوارەكان.

سودانی لە تویتێكدا كە ئاژانسی هەواڵی عێراقی پێی گەیشت نووسیوێتی: سەردانەكەی ئەنتۆنیۆ گۆتێرێس ئەمینداری گشتی نەتەوە یەكگرتووەكان بەرز دەنرخێنین و سوپاسی دەكەین بۆ قسەكانی بۆ پشتیوانی لە عێراق، بۆنەیەك بوو بۆ ئەوەی جەخت لەسەر ستراتیژی خۆمان بكەینەوە لە چاكسازی و گەشەپێدان و بەرەنگاربوونەوەی گەندەڵی”.

سودانی ئەوەیش وتی: چاوەڕوانی پشتیوانی زیاتری نێودەوڵەتین بۆ ڕووبەڕووبوونەوەی ئاستەنگەكانی كەشوهەوا و چارەسەركردنی دۆسیەی ئاوارەكان.

سەرۆكوەزیران، پێشتریش ئەمڕۆ، لە میانی دیدارەكەیدا لەگەڵ گۆتێرێس، پشتڕاستی كردەوە كە عێراق قەیرانە سیاسییەكانی تێپەڕاندووە و بووەتە كلیلی چارەسەركردنی قەیرانەكانی ناوچەكە.

لە ڕاگەیەندراوێكی فەرمیدا لە زاری سەرۆكوەزیرانەوە هاتووە، "سەركەوتنی عێراق بەسەر باندە تیرۆریستییەكانی داعش بەهۆی یەكگرتوویی عێراقییەكان و باوەڕیان بە پێكەوەژیانی ئاشتیانە ڕوویداوە، بەجۆرێك عێراق ئەمڕۆ دەبێتە كلیلی چارەسەركردنی زۆرێك لە قەیرانەكانی ناوچەكە".