هەولێر.... دروستکردنی پرۆژەی خزمەتگوزاری کەرتی تەندروستی

هەولێر ـ  INA
بە گوژمەى نزیکەى (700 ملیۆن دینار،) بەردی بناغەی دروستکردنی بنکەیەکی تەندروستی لە گەڕەکى سێبەردان لەهەولێر دانرا.
ئومێد خۆشناو پارێزگاری هەولێر لەلێدوانێکی ڕۆژنامەوانیدا کەئاژانسی هەواڵی عێراقی وەریگرتووە ڕاگەیاند: ئەمڕۆ دووشەممە 2022.12.26، بەگوژمەى (662 ملیۆن و 750 هەزار دینار) لە سەر بودجەى پەرەپێدانى پارێزگاى هەولێر، بەردی بناغەی پڕۆژەى دروستکردنی بنکەی تەندروستی جۆرىB- لە گەڕەکی سێبەردان دانا، کە بەشێوەى بەڵێندەرایەتى جێبەجێدەکرێت و ماوەى پڕۆژەکەش (380) ڕۆژە.
هەروەها وتی وێڕاى پیرۆزبایمان لە دانیشتوانى گەڕەکى سێبەردان، لە چوارچێوەى پڕۆژەکانى پەرەپێدانى پارێزگاى هەولێر بۆ ساڵى 2023، بەپێى ئەو ئامادەکارى و پلانانەى داڕێژراوە پڕۆژەکانمان هەمەچەشن دەبن لە هەموو سێکتەرەکان.
سەبارەت بە گەڕەکى سێبەردانیش ئێستا دەتوانین بڵێن هەموو شەقامەکانى ئەو گەڕەکە قیڕتاو و کونکرێت کراون، دروستکردنى ئەم بنکە تەندروستیەش یەکێکى دیکەیە لە خزمەتگوزارییەکان، کە دەتوانێت خزمەتێکى زۆرى دانیشتوانى ئەو گەڕەکە بکات، دڵنیایی دەین بە هاوڵاتییانى سنوورى پارێزگاکەمان، وەکو پارێزگاى هەولێر و حکومەتى هەرێمى کوردستان، هەرچى لە تواناماندابێت پێشکەشى بکەین بۆ خزمەتکردنى هاوڵاتییان.