نێچیرڤان بارزان: تانهو ڕەوشا شنگالێ نەئاسایى یە، هێشتا ده‌هان هزار خێزان نەشیاینە ڤەگەڕنە دەڤەرا شنگالێ
سیاسی
- 3-08-2022, 13:22
هەولێر ـ INA
ئەمڕۆ چوارشەممە 3/8/2022 بە ئامادەبوونی نێچیرڤان بارزانی، سەرۆكی هەرێمی كوردستان، نوێنەری مستەفا كازمی سەرۆك وەزیرانی عێراق، نوێنەرانی نەتەوە یەكگرتووەكان و كونسولخانە و نوێنەرایەتیی وڵاتانی بیانی، بەرپرسانی حزبی و حكوومی سنووری پارێزگای دهۆك و مووسڵ، كەسوكاری قوربانیان و ژمارەیەكی زۆری هاوڵاتیانی ئێزدی، لە قەزای سێمێلی سەر بە پارێزگای دهۆك ڕێوڕەسمێك بۆ یادی هەشت ساڵەی جینۆسایدی ئێزدیان لە شەنگال و دەوروبەری كە لەلایەن ڕێكخراوی تیرۆریستیی داعش ئەنجامدرا، بەڕێوەچوو.
لە ڕێوڕەسمەكەدا دوای پێشكەش كردنی چەند وتەیەك لەلایەن بەڕێزان پارێزگاری دهۆك و وەزیری كاروباری شەهیدان، سەرۆك نێچیرڤان بارزانی وتەیەكی پێشكەش كرد ولەبەشێکیدا هاتووە:
ئه‌ڤڕۆ ئه‌م هه‌مى پێكڤه ب دله‌كێ تژى كۆڤان، بيرهاتنا هه‌شته‌مين سالڤەگەڕا جينۆسايدا شه‌نگالێ دكه‌ين، كو مەزنترین کارەساتا سه‌ده‌يێ بيست و ئێكێ يه، هاتيه سه‌رێ ئێزدیا و گەلێ کوردستانێ. سەرێ ڕێزێ لبەر گیانێ پاقژێ شەهید و جانگۆرى يێن ئێزدى دچەمینین د ڤێ ڕۆژێدا.
ئەڤ کارەساتا داعشێ، بوویە به‌رپه‌ڕه‌كێ دی یێ خوينێ يێ دیرۆکا کوردستانێ و فەرمانەکا دی یە یا ل سه‌ر ئێزدیا. پێنج هزار ژن و زارۆك و مێرێن ئێزدی بوونه قوربانى. هەتا نهۆ ژی (٢,٧١٧) ئێزدی ڕەڤاندینه، هێشتا (٣٢٥) هزار ئێزدی ل کەمپا ئاوارەنە. (١٠٠) هزار ئێزدی ل وه‌ڵاتێن جیهانێ په‌نابه‌ر بوونە. پتریا شنگالێ وێران بوویە و خه‌لكێ وێ بێ مال و حال بوون.
هەروەها دبەشەکا دییا گوتارا خوەدا سەرۆکێ هەرێما کوردستانێ بالکشاندە سەر رەوشا عیراقێ وگۆت: وه‌كى ئه‌م هه‌مى دبينين، ڕه‌وشا سياسى و ئه‌منى يا عێراقێ هه‌ر يا ئالۆز دبيت. ناكۆكيێن هێز و لايه‌نێن سياسى، گه‌هشتينه ئاسته‌كێ گه‌له‌ك مه‌ترسيدار! عێراق ئه‌ڤڕۆ موحتاجى هاريكارى و پێكڤه‌كاركرنا هه‌مى هێز و لايه‌نێن سياسييه. پاراستنا ئارامى و سه‌قامگيريا عێراقێ، ئه‌رك و به‌رپرسياريا هه‌ڤبه‌ش يا هه‌مى هێز و لايه‌ن و پێكهاتێن عێراقێ يه.
ئارامى و ئاسايش و سه‌قامگيريا هه‌مى عێراقێ يا پێكڤه گرێدايیه. ژبه‌ر هندێ جاره‌كا دى داخازێ ژ هه‌مى هێز و لايه‌نێن عێراقى دكه‌م، پێكڤه لسه‌ر مێزا دانوستاندنێ هه‌مى كێشه‌يا چاره‌سه‌ر بكه‌ن.
