كازمى و میكینزی رێكه‌وتن له‌سه‌ر دیاریكردنی میكانیزمێك بۆ جێبه‌جێكردنی دیالۆگی ستراتیژی
ئەمنی
- 20-05-2021, 17:13
به‌غدا-اه‌ع
مسته‌فا كازمى سه‌رۆك وه‌زیران،ئه‌مڕۆ پێنجشه‌ممه له‌دیدارێكدا له‌گه‌ڵ جه‌نه‌راڵ كینیس میكینزی فه‌رمانده‌ی فه‌رمانده‌یی ناوه‌ندیی ئه‌مریكا، رێكه‌وتن له‌سه‌ر دیاریكردنی میكانیزمێك بۆ جێبه‌جێكردنی خولی سێیه‌می دیالۆگی ستراتیژی نێوان به‌غدا و واشنتن.
نوسینگه‌ى راگه‌یاندنى سه‌رۆك وه‌زیران له راگه‌یاندراوێكدا كه ده‌ستى ئاژانسى هه‌واڵى عێراقى(اه‌ع) كه‌وتووه رایگه‌یاند:"مسته‌فا كازمی سه‌رۆك وه‌زیران ئه‌مڕۆ پێشوازی له جه‌نه‌راڵ كینیس میكینزی فه‌رمانده‌ی فه‌رمانده‌یی ناوه‌ندی ئه‌مریكا كرد و له‌دیدارێكدا، باس له په‌یوه‌ندی نێوان عێراق و ئه‌مه‌ریكا و هاوپه‌یمانی نێوده‌وڵه‌تی كرا".
هه‌ردولا باسیان له په‌ره‌سه‌ندنه‌كانی بارودۆخی مه‌یدانی و هه‌ماهه‌نگی هاوبه‌ش كرد له شه‌ڕی دژی چه‌كدارانی داعش، به تایبه‌ت له به‌ر ڕۆشنایی ئه‌و گه‌شه‌كردنه گه‌وره‌یه‌ی له توانای هێزه عێراقییه‌كاندا هه‌یه .
هه‌ر له راگه‌یاندراوه‌كه‌دا هاتووه "مسته‌فا كازمی و شانده‌كه‌ی فه‌رمانده‌یی ناوه‌ندی ئه‌مریكا، ڕێككه‌وتن له‌سه‌رئه‌وه‌ی یه‌كه‌م دانیشتنی لیژنه‌ی ته‌كنیكی تایبه‌تمه‌ند بكرێت، به‌مه‌به‌ستی جێبه‌جێكردنی ئه‌نجامه‌كانی خولی سێیه‌می دیالۆگی ستراتیژیی نێوان عێراق و ئه‌مریكا، له‌گه‌ڵئه‌وه‌شدا كشانه‌وه‌ی هێزه شه‌ڕكه‌ره‌كانی هاوپه‌یمانیی نێوده‌وڵه‌تی له عێراق به‌رده‌وام بێت".
ئاماژه‌به‌وه‌كرا" گفتوگۆ له‌باره‌ی په‌یوه‌ندیه ئه‌منیه‌كانی نێوان هه‌ردو وڵات كرا له‌ڕووى مه‌شق و ڕاهێنان و پاڵپشتی لۆجستی و ئاڵوگۆڕی زانیاریه‌وه، به‌وجۆره‌ی كه پشتیوانی له‌تواناكانی دامه‌زراوه‌ی سه‌ربازیی عێراق بكات بۆ گه‌یشتن به‌پشت به‌ستن به‌خۆیان له‌به‌ره‌نگاربونه‌وه‌ی ئاسته‌نگه‌كانی له ئێستاو له داهاتودا".
