سەرۆكی هەرێمی كوردستان بۆ كۆچی دوایی ساڵح قەللاب وەزیری پێشووتری رۆشنبیری ئوردن پرسەنامەیەك رادەگەیەنێت

هەولێر - INA
ئەمڕۆ چوارشەممە، نێچیرڤان بارزانی سەرۆكی هەرێمی كوردستان، بەبۆنەی كۆچی دوایی ساڵح ئەلقەللاب نوسەر و میدیاكاری دیار و وەزیری پێشوتری ڕۆشنبیریی ئوردن پرسەنامەسەكی ئاراستەی خانەوادەو هاوڕێیانی كرد.
سەرۆكی هەرێمی كوردستان لە بەیاننامەیەكدا كە بۆ ئاژانسی هەواڵی عێراقی ناردووە، دەڵێت: بۆ كۆچی دواییی نووسەر و میدیاكاری دیار و وەزیری پێشووتری ڕۆشنبیریی ئوردن، خوالێخۆشبوو ساڵح ئەلقەللاب، پرسە و سەرەخۆشیی قووڵم ئاراستەی خانەوادە و كەسوكار و هاوڕێیانی دەكەم. هاوسۆز و هاوخەمیانم، لە یەزدانی مەزن داواكارم گیانی بەزەیی و میهرەبانیی خۆی شاد بكات و ئارامی و دڵنەوایی بە هەمووان ببەخشێت.
ئاماژەی بۆ ئەوەشكردووە: خوالێخۆشبوو ساڵح ئەلقەللاب دۆستی دڵسۆزی گەلی كوردستان بوو، بۆیە هەمیشە بە ڕێز و پێزانینەوە لە هەڵوێست و پشتگیری و داكۆكیكاریی ئەو لە مافەكانی دەڕوانێت، گیانی شاد و یادی هەمیشە بە خێر بێت.