سه‌رۆكی هه‌رێمی كوردستان و بالیۆزی رووسیا دوايين پێشهاته سياسييه‌كانى عيراق تاوتوێ ده‌كه‌ن
سیاسی
- 11-05-2022, 14:28
هه‌ولێرـ INA
ئه‌مڕۆ چوارشه‌ممه نێچيرڤان بارزانى سه‌رۆكى هه‌رێمى كوردستان پێشوازى له ئيلبروس كوتراشێڤ باڵيۆزى ڕووسيا له عيراق و كونسولى گشتی رووسيا له هه‌رێمى كوردستان و شاندێكى ياوه‌رىان كرد.
نووسینگه‌ی سه‌رۆكی هه‌رێم له‌راگه‌یندراوێكدا كه كۆپیه‌ك بۆ ئاژانسی هه‌واڵی عێراقی (INA ) نێدراوه راگه‌یاندووه" له كۆبوونه‌وه‌يه‌كدا دوايين پێشهاته سياسييه‌كانى عيراق و دواكه‌وتنى پرۆسه‌ى هه‌ڵبژاردنى سه‌ركۆمار و پێكهێنانى حكوومه‌تى تازه، په‌يوه‌ندييه‌كانى ڕووسيا له‌گه‌ڵ عيراق و هه‌رێمى كوردستان و په‌يوه‌ندييه‌كانى هه‌ولێر ـ به‌غدا، تاوتوێ كران.
هه‌روه‌ها وتی" له‌م كۆبوونه‌وه‌یه‌دا سه‌رۆكی هه‌رێمی كوردستان جه‌ختى له پێويستيى گفتوگۆ و گه‌يشتنى هێز و لايه‌نه عيراقييه‌كان و هاريكاريى هاوبه‌شييان بۆ لێكگه‌يشتن و ڕێككه‌وتن له‌سه‌ر تێپه‌راندنى به‌ربه‌ست و سه‌ختييه‌كانى به‌رده‌م پرۆسه‌ى سياسى له وڵات، كرده‌وه.
راگه‌یندراوه‌كه ئاماژه به‌وه‌شی داوه كه شه‌ڕ و پێكدادان له ئۆكراينا و كاريگه‌رى و لێكه‌وته‌كانى و دوايين پێشهاته‌كانى ناوچه‌كه به‌گشتى و چه‌ند پرسێكى ديكه‌ى جێى بايه‌خى هاوبه‌ش ته‌وه‌رێكى ديكه‌ى كۆبوونه‌وه‌كه بوون.
