هەڵبژاردنی پەرلەمانی كوردستان دەستیپێكرد
- 30-09-2018, 00:00
هەرێم – ا ه ع
كاتژمێر هەشت بنكەكانی دەنگدان بەڕووی هاوڵاتیاندا كرانەوە و هەڵبژاردن دەستیپێكرد.
لە ھەڵبژاردنی خولی پێنجەمی پەرلەمانی كوردستاندا، سێ ملیۆن و ٨٥ ھەزار و ٤٦١ كەس مافی دەنگدانیان ھەیە.
زۆرترین ژمارەی ئەو كەسانەی مافی دەنگدانیان ھەیە دەكەونە سنوری پارێزگای سلێمانی یەوە، كە ژمارەیان ملیۆنێك و ١٩٦ ھەزار و ٩٨٠ كەسە و بەسەر ٢٣٧٨ وێستگەدا دابەشكراون، لە پارێزگای ھەولێریش ملیۆنێك و ١٠٩ ھەزار و ٧٢ كەس مافی دەنگدانیان ھەیە كە بەسەر دوو ھەزار و ٣٠٤ وێستگەدا دابەشكراون.
ژمارەی دەنگدەرانی پارێزگای دھۆك ٧١١ ھەزار و ٢١٨ كەسە كە بەسەر ١٤٥٣ وێستگەدا دابەشكراون، لە پارێزگای ھەڵەبجەش ٦٨ ھەزار و ١٩١ كەس مافی دەنگدانیان ھەیە كە ١٤٢ وێستگەیان بۆ تەرخانكراوە.
بەپێی ئامارەكان، لە كۆی ژمارەی دەنگدەران لەم ھەڵبژاردنەدا ٣٧١ ھەزار و ٥٦٠ كەس بۆ یەكەمجار مافی دەنگدانیان ھەیە.
