ئیمارات ئیدانەی هێرشەكەی توركیا بۆ سەر دهۆك دەكات و بە تاوان وەسفی دەكات

سیاسی

22-07-2022, 18:48

بەغداد - INA

دەوڵەتی ئیمارات ئەمڕۆ هەینی هێرشی توركیا بۆ سەر ناوچەیەكی گەشتیاری لە پارێزگای دهۆك لە باكوری عێراق بە توندی ئیدانە كرد و بە تاوان وەسفی كرد.

وەزارەتی دەرەوە و هەماهەنگی نێودەوڵەتی ئیمارات لە بەیاننامەیەكدا كە دەست ئاژانسی هەواڵی عێراقی كەوتووە، دەڵێت: ئیمارات بەتوندی ئیدانەی ئەو كارە تاوانكاریانە و ڕەتكردنەوەی بەردەوامی هەموو شێوازەكانی توندوتیژی دەكات كە ئامانج لێی ناسەقامگیركردنی ئاسایش و پێچەوانەی بنەماكانی مرۆڤایەتیە.

ئاماژەی بۆ ئەوەشكردووە: وەزارەتی دەرەوە هاوخەمی ئیماراتی دەردەبڕیت لەگەڵ هەموو ئەو ڕێوشوێنانەی عێراق برا بۆ پاراستنی سەروەری و ئاسایش و سەقامگیریی خۆی گرتویەتیەبەر و جەختیشی كردەوە لەسەر پەرۆشی ئیمارات بۆ بەرقەراركردنی ئاسایش و سەقامگیریی عێراق.

راشیگەیاند: وەزارەت سەرەخۆشی دڵسۆزانەی خۆی بۆ حكومەت و خەڵكی كۆماری عێراق و خانەوادە و كەسوكاری قوربانیانی ئەو تاوانە قێزەونە دەردەبڕێت و ئاواتەخوازە هەموو بریندارەكان بە زووی باش ببنەوە.