ڕاوێژکارى كازمى: ترس لەسەر سیستمى پێدانى مووچه‌ى فه‌رمانبه‌ران له‌سایه‌ى وردبینى ڕێكخراوى دارایی نییە

ئابوری
  • 18-05-2021, 14:30
  • +A -A

    به‌غدا-اه‌ع   
    مەزهەر محەمەد ساڵح ڕاوێژکارى دارایى سەرۆک وەزیران،ئه‌مڕۆ سێشه‌ممه‌، لەبارەى موچەى فەرمانبەران و خانەنشینان و چاودێرانى کۆمەڵایەتى لەمساڵ و ساڵى داهاتووش دڵنیایى دەدات، ترسى خۆشى لە دواکەوتنى تێپەڕاندنى پڕۆژە یاساى بودجەى 2022 پیشان دەدات.  
    ساڵح،بە ئاژانسى هەواڵى عێراقی(اه‌ع) ڕاگەیاندووە، پارەى نەختینەى حکومەتى عێراقى لە ئێستادا لە باشترین بارودۆخدایە، ڕێژەى مامناوەندى نرخى بەرمیلێک نەوت نزیکەى 60 دۆلارە، ئەو پابەندبوونانەى هەیە بە باشترین شێوە ئەنجام دراون و نەختینە لە ئاستى باڵادایە.  
    ڕونیشیکردووەتەوە، بوونى قەرزى ناوخۆیى لە بودجەدا بەهۆى ترسەوە بوو لە کەمى نەختینە، ئەگەر نرخى دیاریکراوى بەرمیلێک نەوت 45 دۆلار بێت و نرخى ڕاستەقینەى 60 دۆلار بێت، جیاوازییەک دروست دەکات بۆ پڕکردنەوەى پێویستییەکان لەسەر بنەماى دابینکردنى کوردتهێنان لە ڕێگەى قەرزەوە.  
    ڕاوێژکارى سەرۆک وەزیران وتیشى، کاتێک 83%ى داهات لە نەوتەوە بێت پێویستە 17%ەکەى ترى لە داهاتە نانەوتییەکانەوە بێت، بەڵام بەشێوەیەکى پراکتیکى ئەوە بوونى نییە، ئەو بۆشاییەش بە قەرز پڕدەکرێتەوە.  
    سەبارەت بە بارودۆخى ئابوریى باسى لەوەکردووە، بەشێوەیەکى گشتى جێى دڵنیاییە و لە ئێستادا ترسى لەسەر نییە، دیارترین ئاڵنگارییە ئابورییەکان ئەوەیە کە کاتى هەڵبژاردنى پەرلەمان هاوکاتە لە پێشکەشکردنى پرۆژە یاساى بودجەى 2022 لە نێوان ئەنجومەنى وەزیران کە دەبێتە حکومەتێکى کار ڕاییکەر و ناتوانێت پرۆژە یاسا تێپەڕێنێت و پەرلەمان کە بەشێوەیەکى دەستوریى خەریکە کۆتایى دێت.  
    مەزهەر محەمەد ساڵح پێشى وایە، ئەوەش جێى نیگەرانییە و نازانین کە هەڵبژاردن چۆن کۆتایى دێت و حکومەت و پەرلەمانى داهاتوو چۆن پێکدەهێنرێن، سەرجەم ئەو بابەتانە دژى تێپەڕاندنى پرۆژە یاساى بودجە و دواکەوتنین، بەڵام ترس لەسەر سیستمى پێدانى موچە نییە و بارودۆخەکە تا کۆتایى 2022 جێى دڵنیاییە.