ساڵح و كازمى جه‌ختیانكرده‌وه له گرنگى پاڵپشتى رێكاره‌كانى سەرخستنی پرۆسەی هەڵبژاردن
ناوخۆ
- 18-01-2021, 00:00
به‌غدا-اه‌ع
به‌رهه‌م ساڵح سه‌رۆك كۆمار و مسته‌فا كازمى سه‌رۆك وه‌زیران ،ئه‌مڕۆ دوشه‌ممه،جه‌ختیانكرده‌وه له گرنگى پاڵپشتى رێكاره‌كانى سەرخستنی پرۆسەی هەڵبژاردن.
نوسینگه‌ى راگه‌یاندنى سه‌رۆكایه‌تى كۆمار له ڕاگه‌یاندراوێكدا كه ده‌ستى ئاژانسى هه‌واڵى عێراقى(اه‌ع) كه‌وتووه رایگه‌یاند:" ساڵح لە کۆشکی بەغداد پێشوازیکرد لە موستەفا کازمی، سەرۆک وەزیران و گفتوگۆکرا سەبارەت بە پێشهاتە سیاسی و ئەمنی و ئابوورییەکانی وڵات.
لەمیانی کۆبوونەوەکەدا بەگرنگییەوە باس لە پێویستی چەسپاندنی ئارامی عێراق و پاراستنی ئاسایش و سەلامەتی هاووڵاتیان و بەهێزکردنی دەسەڵاتی دەزگا ئەمنییەکان و جێبەجێکردنی یاسا کرا، لە پێناو زامنکردنی ئاشتی و ئاسایشی گشتی و رێگریکردن لەو کارانەی لە دەرەوەی یاسان و رێکخستنەوەی چەک.
هەردوولا تاوتوێی هەڵبژاردنەکانی داهاتوویانکرد و پێداگری کرا لەگرنگی ئەنجامدانی هەڵبژاردنەکان و پشتیوانی تەواوی خۆشیان دووپاتکردەوە بۆ سەرخستنی پرۆسەی هەڵبژاردنەکان و رێگریکردن لە ساختەکاری و فرتوفێڵ، هەروەها گرنگی چاودێریکردنی پرۆسەی ھەڵبژاردنەکان لەلایەن چاودێرە نێودەوڵەتییەکان بە شێوەیەکی جددی بە هەماهەنگی لەگەڵ لایەنە پەیوەندیدارەکان و نوێنەرایەتی نەتەوە یەکگرتووەکان و زامنکردنی دەرفەتی بەشداری فراوان بۆ گشت هاووڵاتیان.
هه‌روه‌ها باس لە دۆخی ئابووری وڵات و بودجەی گشتی کرا، بۆ ئەو مەبەستە ھەردوو سەرۆک رێککەوتن لەسەر گرنگی تێپەڕاندنی پرۆژە یاسای بودجەی گشتی و پاراستنی مافی تەواوی مووچەخۆرانی عێراق و ھەرێمی کوردستان دوور لە ململانێ سیاسییەکان و گەیشتن بە چارەسەرێکی بنەڕەتی لە نێوان حکومەتی فیدڕاڵ و حکومەتی هەرێمی کوردستان سەبارەت بە دۆسییە داراییە هەڵپەسێردراوەکان، بەجۆرێک زامنی مافی مووچەخۆران و هاووڵاتیان و چین و توێژە کەمدەرامەتەکان بکات بەبێ جیاوازی.
