سەرۆك كۆمار پیرۆزبایی جەژنەكانی لەدایكبوونی كرد، دووپاتیكردەوە مەسیحییەكان روبەڕووی پەلاماری دڕندانە بوونەوە، بەڵام هەڵوێستی نیشتمانییەکانیان هەر نەگۆڕ و بەهێز بوو

الثلاثاء 25 كانون أول 2018 - 15:38

سەرۆك كۆمار پیرۆزبایی جەژنەكانی لەدایكبوونی كرد، دووپاتیكردەوە مەسیحییەكان روبەڕووی پەلاماری دڕندانە بوونەوە، بەڵام هەڵوێستی نیشتمانییەکانیان هەر نەگۆڕ و بەهێز بوو

بەڕێز سەرۆك كۆمار د. بەرهەم ساڵح بە بۆنەی جەژنەكانی لە دایكبوون و ساڵی نوێی میلادییەوە پیرۆزبایی لە خوشك و برایانی مەسیحی و تەواوی عێراقییەكان كرد.

ئێوارەی ئەمڕۆ دووشەممە ٢٤|١٢|٢٠١٨ بەڕێز سەرۆك كۆمار لەگەڵ خانمی یەكەم خاتوو سەرباخ ساڵح ئامادەی قوداسێك بوو كە لە كڵێسای مار یوسف لە بەغداد بە بۆنەی یادی لە دایكبوونی حەزرەتی مەسیح (سڵاوی خوای لێ بێت ) بەڕێوە چوو، لە پەیامێكیدا بەڕێزیان وتی " دەستپێکی کۆتایی ھاتنی تیرۆر لێرە لە عێراقدا ھاتە ئاراوە و عێراقییەکان بە قارەمانێتی و قوربانیدانەکانیان تۆماریان کرد.

بەڕێزیان دووپاتیكردەوە ، پەلامارەکانی تەكفیریی و تیرۆریستان دژی مەسیحی و مەسیحییەکان لە ناوچەی خۆرهەڵات و رۆڵەی ئاینەکانی تر سەخت و دڕندانە بوو ، بەڵام ھەڵوێستی بەرپەرچدانەوەی رۆڵە مەسیحییەکانی گەلەكەمان لەئاست نەھامەتیەکاندا و لەئاست یەکڕیزیی نیشتمانی و مرۆڤایەتیدا بەھێز بوو ".

سەرۆك كۆمار لەو پەیامەیدا كە لە كڵێسای مار یوسف پێشكەشی كرد دووپاتیكردەوە پێویستە هەوڵ بدەین بۆ دابینكردنی پێداویستییەكانی بونیادنان و بەدیهێنانی ئاسایش و بەگژاچوونەوەی گەندەڵی و روبەڕوو بوونەوەی كێشە ئابووری و ئیداری و سیاسییەكان و تەواوكردنی بونیادنانی عێراقی دیموكراتی فیدراڵ كە پشت بە دەستوور ببەستێت.

ئەمەش دەقی پەیامەکەی بەڕێز سەرۆک کۆمارە:

بسم الله الرحمن الرحيم

(( إِذْ قَالَتِ الْمَلآئِكَةُ يَا مَرْيَمُ إِنَّ اللّهَ يُبَشِّرُكِ بِكَلِمَةٍ مِّنْهُ اسْمُهُ الْمَسِيحُ عِيسَى ابْنُ مَرْيَمَ وَجِيهاً فِي الدُّنْيَا وَالآخِرَةِ وَمِنَ الْمُقَرَّبِينَ)) 
 
صدق الله العظيم 

هاووڵاتیانی عێراق به‌ موسڵمان و مەسیحی و ئاین و پێکھاتەکانی ترەوە..

ئەوانەی باوەڕتان بە حەزرەتی مەسیح (سڵاوی خوای لێ بێت ) و پەیامەکەی ھێناوە، لە پێناوی ئیمان و خۆشه‌ویستی و ئاشتیدا ..

سڵاوی خوداتان لێ بێت

لە یادی هاتنەوەی لەدایکبوونی حەزرەتی مه‌سیح دا گەرمترین پیرۆزبایی پێشکەش بە هه‌موو خه‌ڵكی عێراق و مەسیحییەکانی عێراق دەکەین لە ھەر جێیەک بن و پیرۆزبایی لە تەواوی مرۆڤایەتی دەکەین، لە پەروەردگارمان داوا دەکەین ژیانی ھەمووان پڕ بێت لە خۆشی و خۆشه‌ویستی و ئارامی.

لێرەدا لە بە بەغداد و لە شەوی لەدایکبوونی حەزرەتی مەسیح دا (سڵاوی خوای لێ بێت) بۆتان دەدوێم، رەنگە قسەکانم ھیچ جیاوازیەکی زیاتری نەبێت لەوەی لە مزگەوتێکدا یا کڵێسایەک یاخود پەرستگای ئاینێکی تری عێراقدا دەیکەم ...، چونکە ئەمە پەیامی یەکڕیزییە کە وەک سەرۆک کۆماری عێراق دەیگەیەنم و پێشکەش بە ھەموو خه‌ڵكی عێراقی دەکەم بە ھەموو ئاین و نەژاد و رەگەزێکیانەوە، ئەمەش پەیامێکە پەیوەستە بە بابه‌تی مرۆڤ و ھاووڵاتی بوونەوە، پەیوەستە بە ھەوڵەکانمان بۆ بونیادنانی نیشتمانەکەمان لەسەر بناغەیەکی راست و رەوا کە پشت دەبەستێت بە پێودانگەکانی لێبوردەیی و دادپەروەری و چاکسازی و دەسەڵاتی یاسا و یەکسانی.

لە کاتێکدا پیرۆزبایی لە ھەموو خه‌ڵكی عێراق دەکەم بە جیاوازیی پێكهاتەكانیانەوە، لێرەدا بە تایبەتی ناوی خوشک و برایانی مەسیحی دەھێنم کە جارێکی تریش سەلماندیانەوە کە بە ھەق شوێن کەوتوانی حەزرەتی مەسیح و پرەنسیب و بیروباوەڕەکەین لە خۆشه‌ویستی و ئاشتیدا، ئەوەشیان بە خۆڕاگریی و قوربانیدانی گەورە سەلماند لە بەرەنگاربوونەوەیاندا لەبەردەم دڕندەیی تیرۆر و پەیوەست بوونی بەھێزیان بە وڵات و گەلەکەیانەوە.

پێویستە لێرەدا دووپاتی بکەینەوە پەلامارەکان دژی مەسیحی و رۆڵەی ئاینەکانی تر سەخت و دڕندانە بوون، ئەمە ھەر بەتەنیا لە عێراقدا نەبوو، بەڵکو مەسیحییەکانی لە ناوچەی خۆرهەڵات و لە عێراق و لە سوریا و لە میسریش روبەڕووی دەستدرێژی وتاوانکارییەکانی تەکفیرییە تیرۆریستی کردەوە، ھەڵوێستی بەرپەرچدانەوەی مەسیحییەکان لەئاست نەھامەتیەکاندا و لەئاست یەکڕیزیی نیشتمانی و مرۆڤایەتیاندا بەھێز بوو، ئەمەش نمونەی باھادار بوونیان بوو لە بەرجەستە کردنی رەوشت و پرەنسیبەکانی حەزرەتی مەسیح دا (سڵاوی خوای لێ بێت).

بە دڵنیاییەوە توندڕەوەكان بە رەفتاری لادەرانەیان گوزارشتیان لە ھیچ ئایین و رەوشت و بیروباوەڕێک نەکردووە.

ھەڵوێستی یەکگرتووی جەماوەر دژی تاوان و تاوانباران دابڕاویی و گومڕایی تیرۆرستانی دووپاتکردەوە، ھەروەک ھەڵوێستی مەزنی مەرجەعیەتی باڵای ئاینی ھەمان ھەڵوێستی دووپاتکردەوە کەگەلەکەمانی ھاندا بۆ نواندنی ھەڵوێستی قارەمانانە و جوامێرانە دژی تیرۆر.

بەم ھاوخەباتی و دەست لەناو دەستکردنە بەسەر تیرۆردا سەرکەوتین، ھەروەھا بە یەکڕیزییەکەمان و بەپشتیوانی دۆستە دڵسۆزەکانمان و ھاوپەیمانەکان و لەگەڵ ھێزەکانماندا كه‌ یەکێک لە داستانە ھەرە مەزنەکانی قارەمانێتیان تۆمار کرد لە تێکشکاندنی تیرۆر و تیرۆریستاندا، سەرکەوتنمان بەدەستھێنا.

دەتوانین بڵێین رۆڵەکانی دوای خۆشمان شانازی بکەن کە دەستپێکی کۆتایی ھاتنی تیرۆر لێرە لە عێراقدا ھاتە ئاراوە و خه‌ڵكی عێراق بە قارەمانێتی و قوربانیدانەکانیان تۆماریان کرد، ئەگەرچی بەدیھێنانی ئەو سەرکەوتنەمان باجەکەی قورس بوو، بەڵام ئەركی سەرشانمان پاراستنی ئەو سەركەوتنەیە بە چاكسازی و ئاشتبوونەوە و ریشە كێشكردنی فكری توندڕەوی.

فرە رەنگی نەژادی و نەتەوەیی ھەمیشە لە کۆمەڵگەی عێراقدا فاکتەری بەھێزی و زیندوی کلتور و شارستانییە جیا جیاکانی خاکی رافیدەینی دایک و لانکی شارستانییەکانە، پێویستە لەسەرمان ھەوڵی بەھێزکردن و دەوڵەمەندکردنی ئەم فرە رەنگییە بدەین و بیپارێزین و دەستبەرداری نەبین و پەرەی پێ بدەین لە رێی دەركردنی ئەو یاسا و رێسایانەی كە گوتاری بوغزو کینە رەتدەكەنەوە و بەرپرسیارانی ئەو گوتارانە بەتوندی سزا بدرێن، ئێمەش سەركردەكان و دەستەبژێرەكان لە رێی پەیوەندی و كاری بەردەواممانەوە دەوڵەمەندی بكەین و پابەندی بین چونكە گرنگترین پێگەی هێزمان بەرجەستە دەكات لە لاپەڕەكانی مێژوودا.
 
ساڵێكی نوێ دێتەوە، رۆڵەكانمان لە كامپی ئاوارەكاندا بەدەست كێشەكانەوە دەناڵێنن، پەنابەرەكان بە هیوای گەڕانەوەن بۆ سەر ماڵ و حاڵ و زێدی خۆیان، نابێت هەست بە ئارامی و دڵنیایی بكەین لە كاتێكدا رۆڵە و هاوسەری شەهیدەكانمان مافی دابینكردنی بژێوی ژیانیان بە سەربەرزیی وەرنەگرتووە و پێیان نەبەخشراوە. 

ناتوانین هەست بە ئارامی و بێ خەمی بكەین كە رۆڵە ئێزدی و مەسیحی و توركمان و شەبەك و كاكەییەكان و ئەوانی تریشمان لە دەشتی نەینەوا لە ماڵ و گوند و شار و شارۆچكەكانیان راگوێزراون، ئارام نابین كە دەبینین دایك و خوشك و رۆڵەی كەس و كارە ئێزدییەكانمان هەموو رۆژێك لە شەنگال لە چاوەڕیی بیستنی هەواڵێك یان بینینەوەی ئازیزانیاندان كە لەلایەن ئەو تاوانبارانەی رفاندویانن بێ سەروشوێن كراون و تا ئێستاش چارەنوسی زۆربەیان نادیاره‌.

ئاڵانگاریی زۆرمان لەبەردەمدایە بۆ خزمەتكردنی كەس و كارمان و رێزگرتنی قوربانییەكانمان، پێویستە ئەوەمان لە بیر بێت كە لەبەردەم بەرپرسیارێتیەكی گەورەداین بۆ بەرەنگار بوونەوەی بیری توند ڕەویی و بن بڕ كردن و ریشە كێش كردنی لە رێی پرۆسەیەكی بە بەرنامە و پلان بۆ دانراو لە ئاستی كۆمەڵایەتی و كلتوری و یاسایی دا، لەلایەکی ترەوە رۆڵی زانایانی ئاینی نەك هەر گرنگە بەڵكو یەكلایی كەرەوەیە چ لە ڤاتیكان یان لە ئەزهەری شەریف یاخود حەوزە عیلمییەكان یان كۆر و ناوەندە ئاینییەكانی تر بەو ئامانجەی پردی لێك تێگەیشتن و هاریكاریی و دیالۆگی فیكری هاوبەش لە نێوانیاندا قوڵ بێتەوە لە پێناوی كوژاندنەوە و خامۆشكردنی ئاگری دەمارگیریی و بەدەستهێنانی سەركەوتنی هاوبەشی مرۆڤایەتیمان و باوەرداریمان بە یەك خالقی بەخشندە و بە بەزەیی 

پێشوازی لە ساڵێكی نوێ دەكەین كە خواست و ئومێدی گەلەكەمانی لەگەڵ خۆیدا دەهێنێت كە بە دەست تیرۆر و خراپی بەڕێوەبردن و توندو تیژییەوە زۆری چەشتووە، ساڵێكی نوێیە و لە بەردەم حكومەتێكی نوێی عێراقیداین كە دەتوانێت سیماكانی عێراقی دوای داعش دیاری بكات.

ئەوەش ئێمەی سیاسەتمەداران و لێپرسراوان دەخاتە بەردەم ئەركێك كە بە كارەكانماندا بچینەوە و بۆ گەلەكەمانی دووپات بكەینەوە، ئەوە ئێمەین بە راستی پەندمان وەرگرتووە لە ئەزمونە تاڵ و سەختەكان.
 
ئەگەر سەلماندمان كە لە ئاستی بەرپرسیارێتیداین و هەروەها لە بازنە و چوارچێوەی كارەكانماندا لە سیستمی حوكمڕانیدا بە باشی كارمان كرد و خۆمان دۆزیەوە، ئەوا گەل لێمان دەبورێت.

بۆیە پێویستە هەوڵ بدەین بۆ دابینكردنی پێداویستییەكانی بونیادنان و بەدیهێنانی ئاسایش و بەگژاچوونەوەی گەندەڵی و روبەڕوو بوونەوەی كێشە ئابووری و ئیداری و سیاسییەكان و تەواوكردنی بونیادنانی عێراقی دیموكراتی فیدراڵ كە پشت بە دەستوور ببەستێت.

پێویست ناکات زۆر دووبارەی بکەینەوە کە ئێمە رۆڵەی قوتابخانەی ئیبراھیمی و حەزرەتی مەسیحی نێردراو بۆ سەر ھەموو مرۆڤایەتی و وتەی یەزدانین، پرەنسیبەکانی پەیامە ئاسمانییەکەی کە بونیادنانی مرۆڤ و ئاشتی و خۆشه‌ویستنه‌ پرەنسیبێکی ھاوبەشی ھەموو ئایین و پەیامە ئاسمانییە پیرۆزەکانە، پرەنسیبێکی مرۆڤایەتین گەل و نەتەوە چەوساوەکان لە دەوری کۆدەبنەوە و سودی لێ وەردەگرن بۆ بەدیھێنانی ھیواکانیان لە پێناوی رزگار بونیان و سەرکەوتنیان بەسەر شەڕخوازیی و چەسپاندنی خۆشبەختیدا. 

لێره‌وه‌ ده‌مه‌وێت به‌ كوردی په‌یامێكی كورت بۆ كه‌سوكارم له‌ سلێمانی و هه‌رمووته‌ و عه‌نكاوه‌ بنێرم، رۆژی له‌ دایكبوونی حه‌زره‌تی مه‌سیحتان پیرۆز بیت به‌هیوای ئه‌وه‌ی په‌یامی خۆشه‌ویستی و ئاشتی حه‌زره‌تی مه‌سیح ببێته‌ مایه‌یی خێر و خۆشی بۆ هه‌موو خه‌ڵكی ئه‌م ناوچه‌یه‌، له‌ زاخۆ له‌ دهوك له‌ عه‌نكاوه‌ له‌ هه‌رمووته‌ له‌ سلێمانی هه‌میشه‌ له‌ خۆشی و شادیا بن.

پەروەردگار پشتیوانمان بێت خۆشمان یارمەتیدەر بین بۆ راپەڕاندنی ئەركەكانی سەرشانمان لە پێناوی ئاشتی بۆ عێراق و خه‌ڵكه‌كه‌ی و زامنكردنی ئارامی و خۆشگوزەرانیان.

با ساڵی نوێمان ساڵی بوژانەوە و بونیادنان و چەسپاندنی ئاشتی بێت

هەموو ساڵێك هەمووان لە خۆشیدا بن

گەورەی هەر بۆ پەروەردگاری مەزن لە گەردوندا، چەسپاندنی ئاشتیش لە سەر زەوی و خۆشی و بەختەوەرییش بۆ مرۆڤەكان.